ភ្នំពេញ៖ រដ្ឋមន្រ្តីការបរទេស និងសហប្រតិបត្តិការអន្តរជាតិ លោកឧបនាយករដ្ឋមន្រ្តី ប្រាក់ សុខុន បានស្នើរសុំ ឯកអគ្គរដ្ឋទូតអ៊ីតាលីប្រចាំកម្ពុជា លោក Lorenzo GALANTI ឱ្យពិនិត្យពិចារណាឡើងវិញអំពីការយកពន្ធខ្ពស់លើការនាំចូលអង្កររបស់កម្ពុជា។

ថ្លែងក្នុងជំនួបសម្តែងការគួរសម និងពិភាក្សាការងារនៅទីស្តីការក្រសួង នាព្រឹកថ្ងៃទី២៦ ខែមេសា ឆ្នាំ២០២២ លោកឧបនាយករដ្ឋមន្រ្តី ប្រាក់ សុខុន បានលើកឡើងអំពីកិច្ចសហប្រតិបត្តិការទ្វេភាគីដ៏ល្អប្រសើរដែលបានស្តែងឱ្យឃើញតាមរយៈការផ្លាស់ប្តូរពាណិជ្ជកម្ម និងវត្តមាននៃម៉ាកផលិតផល និងហាងអាហារល្បីៗរបស់អ៊ីតាលីនៅក្នុងប្រទេសកម្ពុជា ដោយបានគូសបញ្ជាក់ថា បើទោះបីស្ថិតក្នុងវិបត្តិនៃជំងឺកូវីដ-១៩ក្តី ទំហំពាណិជ្ជកម្ម ទ្វេភាគីមានស្ថិរភាពល្អ និងបន្តកើនឡើងលំដាប់ ព្រមទាំងបានលើកទឹក ចិត្តឱ្យភាគីទាំងពីររិះរកមធ្យោបាយ ប្រកបដោយប្រសិទ្ធភាពបន្ថែមទៀតដើម្បីជំរុញកំណើនទំហំពាណិជ្ជកម្ម។

បន្ថែមពីនេះ លោក ប្រាក់ សុខុន បាន ថ្លែងអំណរគុណចំពោះអ៊ីតាលីដែលបានផ្តល់ជំនួយដល់មជ្ឈមណ្ឌល តំបន់អាស៊ានសម្រាប់សកម្មភាពមីន (ARMAC) ហើយដែលជាការឆ្លើយតបលោកឯកអគ្គរដ្ឋទូត បានអះអាងជាថ្មី នូវការបន្តគាំទ្រ និងជួយឧបត្ថម្ភរបស់ប្រទេសអ៊ីតាលីចំពោះមជ្ឈមណ្ឌល ARMAC នេះ។

ពាណិជ្ជកម្មរវាងកម្ពុជា និងអ៊ីតាលីបានស្ទុះងើបឡើងវិញរហូតដល់ប្រមាណ ៤០០លានអឺរ៉ូកាលពីឆ្នាំមុន ដែលមានការកើនឡើង ១២%។ លោកឯកអគ្គរដ្ឋទូត Lorenzo ក៏មានប្រសាសន៍ថា ក្រុមហ៊ុនអ៊ីតាលីនៅក្នុងប្រទេសកម្ពុជា ក៏បានវិនិយោគលើវិស័យដូចជា ផ្នែកកសិឧស្សាហកម្ម និងថាមពលដែលនឹងរួមចំណែកដល់កំណើនសេដ្ឋកិច្ចរយៈពេលវែងរបស់ប្រទេសកម្ពុជា៕